ឆេះឡឥដ្ឋនៅសង្កាត់ស្វាយប៉ាកផ្អើលទាំងយប់
06-May-2016 | ដោយ មែន កំសត់
រាជធានីភ្នំពេញ ៖ សង្ស័យមានអ្នកលួចដុត ឬក៏បណ្តាលមកពីមូលហេតុអី្វ សិប្បកម្មឡឥដ្ឋត្រូវបានអណ្តាតភ្លើងឆាបឆេះសន្ធោសន្ធៅអស់ចំនួន៣រោង បង្កឲ្យមានការភ្ញាក់ផ្អើលកាលពីវេលាម៉ោង១២និង១៥នាទីរំលង អធ្រាត្រឈានចូលថ្ងៃទី៦ ឧសភា ២០១៦ តាមបណ្ដោយផ្លូវបេតុង ស្ថិតក្នុងភូមិឡកំបោរ សង្កាត់ស្វាយប៉ាក ខណ្ឌឬស្សីកែវ ។
បើតាមសមត្ថកិច្ចបានឲ្យដឹងថា ម្ចាស់ឡឥដ្ឋឈ្មោះ ហេង ឈៀង ភេទប្រុស អាយុ៧០ឆ្នាំ ពេលកើតហេតុមិនបានស្នាក់នៅក្នុងឡឥដ្ឋទេ ។ រោងឈើប្រក់ស័ង្កសីចំនួនបីខ្នងនៅក្បែរគ្នាមានទំហំ៣០ម៉ែត្រគុណ ៤០ម៉ែត្រ ត្រូវបានឆាបឆេះអស់ទាំងស្រុង ។
កម្មករដែលស្នាក់នៅកន្លែងកើតហេតុបានឲ្យដឹងថា នៅវេលាម៉ោងកើតហេតុខាងលើ គេបានឃើញអណ្ដាតភ្លើងឆាបឆេះយ៉ាងសន្ធោសន្ធៅចេញពីក្នុងឡឥដ្ឋ ខណៈនោះគេក៏នាំគ្នាយកបំពង់ពន្លត់អគ្គិភ័យ និងទុយោទឹកមកបាញ់ទឹក តែមិនអាចទប់ស្កាត់បានទេ ទើបទាក់ទងទៅសមត្ថកិច្ចហៅរថយន្តពន្លត់អគ្គិភ័យ ហើយរថយន្តពន្លត់អគ្គិភ័យ៦គ្រឿងបានមកដល់ ក៏បាញ់ទឹកពន្លត់រលត់អស់ទៅវិញ ។
ជុំវិញករណីខាងលើនេះ សមត្ថកិច្ចមិនទាន់សន្និដ្ឋានថា បណ្តាលមកពីមូលហេតុអ្វីនៅឡើយទេ គ្រាន់តែសមត្ថកិច្ចបានណែនាំដល់ប្រជាពលរដ្ឋឲ្យចេះការពារ និងទប់ស្កាត់អគ្គិភ័យកើតឡើងដោយជាយថាហេតុផង ព្រោះនេះជារដូវក្ដៅងាយនឹងរងគ្រោះឆេះផ្ទះណាស់។
អគ្គិភ័យខាងលើនេះ ឆេះរោងឡឥដ្ឋអស់ចំនួន៣ តែមិនបណ្តាលឲ្យមានអ្នករងរបួសទេ ប្រភពក្រៅផ្លូវការសង្ស័យថា មានអ្នកលួចដុត ៕
ចំនួនអ្នកទស្សនា
- ថ្ងៃនេះ1821
- ម្សិលមិញ7271
- សប្តាហ៍នេះ21291
- ខែនេះ9101
- ឆ្នាំនេះ992321
- សរុប20219767